ភ្នំពេញ៖ គួរឱ្យសោកស្តាយ សត្វកែះញីមួយក្បាលដែលត្រូវបានមន្ត្រីឧទ្យានុរក្សជួយសង្គ្រោះបានក្រោយពីជាប់អន្ទាក់របស់ព្រានព្រៃនៅក្នុងដែនជម្រកសត្វព្រៃភ្នំសំកុស ខេត្តបាត់ដំបង កាលពីថ្ងៃទី២១ ខែវិច្ឆិកា ឆ្នាំ២០២២ បានស្លាប់ហើយនាថ្ងៃទី៣០ ខែវិច្ឆិកានេះ។
រដ្ឋលេខាធិការ និងអ្នកនាំពាក្យក្រសួងបរិស្ថាន លោក នេត្រ ភក្ត្រា បានបញ្ជាក់ថា សត្វកែះញីមួយក្បាលនោះបានស្លាប់ ក្រោយពីក្រុមគ្រូពេទ្យខិតខំប្រឹងប្រែងសង្រ្គោះអស់ពីលទ្ធភាព បន្ទាប់ពីវាបានជាប់អន្ទាក់បណ្តាលមានរងរបួសភ្លាត់ឆ្អឹងជើងមុខខាងឆ្វេង និងរលូតកូន ដោយសាររត់គេចពីព្រានព្រៃធ្លាក់ជ្រោះ។
លោក នេត្រ ភក្ត្រា បានប្រាប់ដូច្នេះថា៖ «រយៈពេលប៉ុន្មានថ្ងៃនេះ ក្រុមគ្រូពេទ្យបសុសត្វបានខិតខំសង្គ្រោះ តែដោយសារតែស្ថានភាពរបួសធ្ងន់ និងមានភាពគ្រាំគ្រាខ្លាំង មិនអាចឈរបាន ធ្វើឱ្យសត្វកែះញីដែលជាប្រភេទសត្វកម្រនៅលើសកលលោកមួយក្បាលនេះបានស្លាប់បាត់បង់ជីវិត។ លើសពីនេះទៀត សត្វកែះញីមានសុខភាពទន់ខ្សោយដោយ សារតែមានផ្ទៃពោះនិងរលូតកូនស្លាប់ក្នុងផ្ទៃ ហើយរបួសស្បូនខ្លាំងរលូតដល់រលួយ»។
គូសបញ្ជាក់ថា សត្វកែះញីមួយក្បាលនោះត្រូវបានក្រុមអភិរក្ស និងអ្នកជំនាញពេទ្យសត្វបានបញ្ជូនវាមកថែទាំព្យាបាលនៅមជ្ឈមណ្ឌលសង្គ្រោះសត្វព្រៃនៅឧទ្យានជាតិភ្នំតាម៉ៅ នៅថ្ងៃទី២៣ ខែវិច្ឆិកា ឆ្នាំ២០២២។
ក្រសួងបរិស្ថានសោកស្តាយក្រៃលែងចំពោះការបាត់បង់ប្រភេទសត្វកម្រនេះ និងសូមអំពាវនាវដល់ប្រជាពលរដ្ឋចូលរួមការពារនិងអភិរក្សធនធានធម្មជាតិ សត្វព្រៃដែលកម្ពុជាមានឱ្យបានគង់វង្សដោយបញ្ឈប់ការដាក់អន្ទាក់ និងបរបាញ់សត្វគ្រប់ប្រភេទ។
ជាពិសេស សូមនិយាយថាទេចំពោះសាច់សត្វព្រៃ។ ជាមួយគ្នានេះ លោកអំពាវនាវឱ្យប្រជាពលរដ្ឋកុំជឿថាសាច់សត្វ ឆ្អឹង សំណាក និងឈាមសត្វព្រៃជួយព្យាបាលជំងឺ និងធ្វើឱ្យសុខភាពរបស់ខ្លួនល្អ គឺមិនពិតឡើយ។ លោកថា៖ «សូមចូលរួមអភិរក្សសត្វព្រៃនិងជីវៈចម្រុះគ្រប់ប្រភេទដើម្បីមនុស្សជំនាន់ក្រោយ»៕
